WASHINGTON, AP.- Paul Manafort, eks hefe di kampaña di presidente Donald Trump lo bai prizòn. E medida ordená djabièrnè pa un hues federal a pone ku Manafort a bira e promé funshonario di kampaña di Trump pa wòrdu enkarselá pa Robert Mueller, e fiskal spesial kende ta investigá e intervenshon ruso den elekshonnan di aña 2016.
Ya bou di un preshon intenso pa koperá ku e fiskalnan ku e speransa di haña klemensia, Manafort ta pèrdè libertat relativo ku e tabatin miéntras e tabata prepará pa dos huisio penal, enfrentando e posibilidat pa pasa restu di su bida den prizòn.
E hues federal Amy Berman Jackson, a pone fin na e aresto na kas di Manafort i a ordená pa e wòrdu mandá prizòn, sitando kargonan resien presentá pa opstrukshon di hustisia.
Siman pasá, un hurado federal di investigashon a akusá Manafort i un persona asosiá, Konstantin Kilimnik, pa opstrukshon di hustisia algun tempu pasá. Esaki ta suma e múltiple delitonan grave ku ya e ta enfrentá.
E kargonan no ta relashoná ku su trabou den kampaña di Trump i no ta impliká e señalashonnan di interferensia ruso den elekshon presidensial merikano di 2016.
