MONTEVIDEO, URUGUAY, AP.- Eks presidente uruguayo Jorge Batlle ta den un estado grave despues di a kai flou i dal su kabes. El a keda operá ku urgensia djabièrnè pasá pa por a para e hemoragia selebral. E eks mandatario (2000-2005), di 88 aña di edat a sufri un kaida den e siudat di Tacuarembo, 395 kilometer Nort di Montevideo. Maske e operashon tabata un éksito su estado ta di hopi gravedat, asina e dòkternan a informá. “A diagnostiká un hematoma den su kráneo, ku ta komprimí e selebre. A logra hasi e siruhia sin ningun insidente, e sangramentu a keda kontrolá”, asina e neurosiruhano Martín Fernández a bisa. Batlle, ku a keda polítikamente aktivo, tabata na Tacuarembo partisipando den aktividatnan di e “Partido Colorado”. Antes di a yega presidensia na aña 2000, Batlle tabata diputado i senador i tambe un di e figuranan mas importante di polítika uruguayo den siglo XX.
Jorge Batlle ta yu di Luis Batlle, presidente na añanan 1947, 1951, 1954 I 1958, subrino nietu di Jose Batlle i Ordnoñez, e mas influyente polítiko di historia di Uruguay.
