NEW YORK, USA (AFP).- Donald Trump a orkestá un “plan kriminal” pa kometé “Froude elektoral” den 2016, segun fiskal a bisa ayera den e promé kaso penal kontra di un eks-presidente norteamerikano, ku pa kolmo ta aspirá pa regresá White House despues di elekshonnan di 5 di novèmber benidero.
E magnate republikano a “orkestá un plan kriminal pa influensiá e elekshon presidensial di 2016”, segun e fiskal Matthew Colangelo den su presentashon ayera den Korte Supremo di Manhattan.
“Tabata froude elektoral, puro i simplemente”, segun el a bisa na e 12 huradonan i seis suplente ku na final di seis siman di e kaso lo mester emití un fayo unánime pa sea e futuro dje polítiko ku posiblemente ta esun mas kontroversial den historia moderno dje pais.
E di 45 presidente di Merka, di 77 aña, a keda akusá di 34 delito di froude pa skonde e pago di 130.000 dollar na e eks-aktris di sine porno Stormy Daniel, ku e meta pa e no bai den publisidat riba un supuesto enkuentro seksual ku a tuma lugá un dékada promé, den e rekta final dje kampaña di 2016 ku sorpresivamente a hib’é na e presidensia.
Den kaso ku e keda deklará kulpabel, Trump por keda kondená te na 4 aña di prizòn i inkluso pèrdè su derechi di voto. Si e gana e elekshon di novèmber kontra e aktual presidente Joe Biden, e por bira e promé mandatario ku lo goberná e pais for di prizòn.
“No tabata un strategia di komunikashon sino un plan kordiná kompartí di un konspirashon largu pa yuda eligí Donald Trump”, segun fiskal a bisa.
“Ta demokrasia”
Pa e abogado di defensa Todd Blanche, “no tin nada malu pa purba influensiá un elekshon. E kos ei yama demokrasia”.
Despues el a bisa di forma dirèkt na e miembronan di hurado ku Trump “ta un persona manera abo i ami”, e presidente ta inosente”, segun e defensa.
E akusashon mester demostrá ku Trump a orkestá òf a lo ménos a outorisá su eks-abogado Michael Cohen pa saka for di su mes saku sèn pa paga e eks-aktris Stormy Daniels, ku despues a keda debolbé na su persona den pagonan den frakshon disfrasá komo gastunan legal. Cohen a deklará su mes kulpabel pa esaki i den 2018 a keda kondená na tres aña di prizòn. Ademas el a pèrdè su lisensia di abogado.
