MIAMI, USA (AFP).- E diseñadó kolombiana Nancy Gonzalez a keda kondená na 18 luna di prizòn pa a drenta Merka di forma ilegal ku tasnan fabriká ku kueru di animalnan protehá. E empresario, kende su produktonan a keda bendé den pakusnan eksklusivo na New York, Mòsku i Milan, a akudí na tribunal den libertat, lunanan despues di a paga fiansa pa sali for di prizòn.
Den luna di novèmber último, Gonzalez a atmití ku na forma ilegal el a pone riba merkado norteamerikano tasnan trahá ku kueru di kaiman i kolebra pitón, entre febrüari di 2016 i aprel di 2019. Tur dos ta animalnan protehá pa e Konvenshon riba Komersio Internashonal di Espesienan Menasá di Founa i Flora Silvestre (CITES), di kua Merka i Colombia tambe ta firmante.
E diseñadó di a keda ekstraditá pa Merka den ougùstùs di 2023 despues di su detenshon den yüli di 2022 den e siudat kolombiano di Cali. En total el a kumpli 14 luna di prizòn pa e kaso aki.
Gonzalez a pidi amigunan, famia i empleadonan di su fábrika na Colombia pa transportá e tasnan den nan ekipahe na momento ku nan tabata di biahe pa Merka. Una bes ku e tasnan drenta Merka di kontrabanda, e tabata manda nan pa su salanan di eksposishon di su empresa Gzunige, na New York, kaminda tabata bende nan ku pakusnan ku despues ta rebendé esakinan.
Di e manera ei a bende algun shen tas i kartera, di kua e preis tabata superá US$ 2.000.
E pakus Bergdorf Goodman di Manhattan i otro 300 butik di luho tabata algun dje klientenan di Gonzalez.
E defensa a pidi e hues federal Robert N. Scola pa konsiderá e kondena komo ya kumplí pa e lunanan ku e diseñadó a pasa den prizòn.
