JERUZALEM, ISRAEL (AFP).- E hefe di inteligensia militar israelí, e general Aharon Haliva, ayera a presentá su renunsia pa su “responsabilidat” den e atake di Hamas ku a lòs e guera den Gaza, kaminda Israel a primintí di oumentá e preshon riba e movementu islamita.
Den pleno ofensivo den e teritorio palestino, Israel ayera a selebrá inisio di Pasku Hudiu, e fiesta di Pésay, un di esnan mas importante dje kalènder hebreu, marká pa e ousensia di 129 rehen koutivo den Gaza for di 7 di òktober.
Na víspera di e fiesta ei, e promé minister israelí, Benjamin Netanyahu, a primintí di lo propiná Hamas “gòlpinan mas duru”. “Den e próksimo dianan nos lo oumentá e preshon militar i polítika riba Hamas, ya ku ta e úniko manera pa liberá nos rehennan i logra nos viktoria”, segun el a deklará den un video.
Komo e promé responsabel polítiko òf militar di rango haltu pa retirá for di despues dje atake di 7 di òktober perpetrá pa komandonan di Hamas, e general Aharon Haliva a bisa di ta asumí su responsabilidat pa e fayonan di seguridat ku a permití pa e islamitanan a drenta zùit di Israel.
E general Haliva ku esaki a pone fin na su karera militar di 38 aña.
