NASHONNAN UNI, AP.- E representante di ONU pa investigá kasonan di tortura a informá ku su periodo lo kulminá djamars sin ku e por bai e prizòn militar merikano na e base naval di Guantanamo na Cuba.
Juan Méndez a deklará ku el a keda invitá pa bai Guantanamo na 2012 pero bou di kondishonnan ku el a konsiderá inaseptabel. El a bisa ku e no tabatin éksito pa hasi ku outoridatnan lo modifiká e kondishonnan. “E términonan ku nan a ofresé mi tabata básikamente un rekorido na un parti di e instalashon, pero no tur kaminda. Si nan a permití mi papia ku e outoridatnan aya nan, pero no ku ningun prezu. Por lo tantu ta inaseptabel pa mi”, asina Méndez a bisa.
Den Estádos Unídos, solamente prizòn di e isla Rikers den e siudat di New York a permiti’é drenta bou di kondishonnan ku el a aseptá. Méndez, ku a keda torturá durante diktadura militar na Argentina, lo konkluí su periodo dia 31 di yanüari próksimo, ora ku e lo keda remplasá pa e suiso Nils Melzer.
