DUBAI, EMIRATO ARABE UNI, AP.- Sitionan di notisia na Saudi Arabia a reportá un eksploshon pafó di un di e sitionan mas sagrado di islam den e siudat di Medina djaluna, e mesun dia ku e atakantenan suisidio a gòlpia diferente sitio den e reino.
Te ainda outoridatnan no a duna komentario riba e asuntu.
E sitio di notisia Sabq a informá ku e eksploshon a tuma lugá djaluna atardi. Otro portalnan tabata mustra imágennan di un kandela pafó di un edifisio serka di e Moské di Profeta. Te ainda no ta evidente si tin morto herido.
E moské kaminda e profeta Mohammed ta dera ta wòrdu bishitá pa miónes di musulman kada aña durante peregrinashon Mecca.
Mohammed al- Nimr, un bisiña di Watif, a bisa na The Associated Press ku un atakante suisidio i outo bòm a gòlpia e sitio den oranan di atardi, na momentu ku mayoria tabata na yuna den nan kas debí na Ramadan.
Den oranan di mardugá, un otro atakante a kousá un eksploshon serka di e konsulado merikano den e siudat di Yeda, na wèst di Saudi Arabia, segun Ministerio di Interior Saudi.
