WASHINGTON, AP. – Mas di 19.000 e- mail di funshonarionan di Partido Demókrata, kual a keda filtraa promé ku e nominashon di Hillary Clinton durante e konvenshon di e partido otro siman na Philadelphia, ta detayá e divishon entre Komité Nashonal Demókrata i e rival antiguo di Clinton, senador Bernie Sanders.
Vários e-mail publiká pa WikiLeaks ta mustra funshonarionan di Kometé Nashonal Demókrata burlando di Sanders i su siguidónan, i den un instansia, kuestionando su kompromiso ku e religion hudiu. Algun e-mail ta mustra e liderazgo di e partido i na funshonarionan di Kas Blanku evaluando e posibilidat di invitá personanan ku antesedente kontroversial na eventonan di partido demókrata.
Ounke e publikashon di WikiLeaks djabièrnè no ta revelá identidat di esun ku a entregá e material privá, esnan ku konosementu di esaki a bisa luna pasá ku piratanan informátika ruso a penetrá e sistema di kòmpiuter di Komité Nashonal Demókrata (DNC). N’e momentu ei, presidente di e organismo Debbie Wasserman Schultz a bisa ku ta trata di un “insidente serio” i ku un firma independiente kontratá pa limpia ret di e organisashon “a move mas rápido posibel pa purba saka e intrusonan i sigurá nos ret”.
Riba su wèpsait WikiLeaks a bisa ku e serie nobo di e-mail ta bini di kuentanan di “shete figura klave di DNC” i a atvertí ku e publikashon tabata “e promé parti di nos serie nobo di filtrashon di Hillary”, i un indikashon ku pronto por publiká mas material. Entre e funshonario kaminda a publiká nan e-mail tin e bosero di e organismo, Luis Miranda, direktor nashonal di finansa Jordon Kaplan i hefe di finansa Scott Coer.
