ORANJESTAD – E prome propiedad pa e ‘marca hotelero’ Embassy Suites by Hilton, considera como e di dos hotel Hilton na Aruba, ta habri su portanan den 2023. Asina e portal Caribbean Journal ta raporta awor. Investigacion propio di NoticiaCla ta mustra cu e fecha pa cuminsa ricibi turista, ta bira entrante medio maart di 2023. Anteriormente NoticiaCla a anuncia cu e apertura aki (segun e portal turistico ‘hospitality net’) lo tabata pa fin di e aña aki.
Mester bisa cu asina mes tin duda mirando cu no tin ‘accion’ laboral na e hotel. Caribbean Journal (considera como un portal serio di turismo) sinembargo ta cita fuentenan di e cadena hotelero. Mas investigacion di NoticiaCla ta mustra cu riba e portal di e hotel mes, nan ta bisa cu ‘e hotel ta cuminsa acepta reservacion pa Maart 17, 2023 y despues. Den e raportahe ta papia di 330 camber pero NoticiaCla a compronde cu e hotel di 133 suites cu ta cubri mas di 7 mil meter cuadra.
RETRASO
Manera cu e portal aki a raporta anteriormente, tabata ya na 2017 cu ambientalistanan a mustra preocupacion pa cu e localidad di e hotel, ora cu a tende un vrum vrum di e hotel caba. Pero tabata te na 2019 cu oficialmente e propietarionan Venezolano a anuncia cu e hotel lo bin Aruba, e hotel a anuncia aña pasa februari cu na April di e mesun aña (2021) lo a cuminsa tuma reservacion ya cu e hotel tabata cla pa habri e tempo ey. Pero Covid19 a bruha tur cos y awor ta mustra cu den 2023 aki, e hotel finalmente lo habri su portanan. Photo by Hilton
