WASHINGTON – Despues di casi dos aña di tabata ‘mara’ pa alerta debi na e pandemia di coronavirus, recientemente Merca a pone Aruba bek riba nivel normal pa biahe. Departamento di Estado Mericano a emiti alerta ‘nobo’ di biahe pa casi tur parti di mundo, incluyendo Aruba e siman aki. Segun e departamento, esey ta un señal, cu ta hala di e menasa di e pandemia y ta bay ‘bek’ na normalidad.
Mester bisa cu tin pais sinembargo cu a keda cu e menasa di nivel 4. Pa algo mas cu dos aña, Aruba tabata subi y baha entre nivel 3 y 4 di biahe cu ta e nivelnan mas halto pa no biaha, cu tabata nifica un sin fin di restriccion pa mericanonan mas tanto. E tabata nifica cu un grupo grandi di mericano no tabata por a biaha pa motibo cu nan seguro no tabata cubri e biahe e ora. Asina mes Aruba a mustra cu ta habri frontera y a logra gara e mercado bek mas liher cu a premira.
Cada bes sinembargo cu Merca tabata pone Aruba riba nivel di mas halto, esaki tabata afecta reservacionan y actividadnan turistico sin mas. Y tabata dura basta tempo prome cu Aruba baha di e lista ‘famoso’ aki. Pero awor cu e cambio aki, e ta nifica cu no tin ningun restriccion mas pa mericanonan cu biaha pa Aruba, otro cu e cautela di semper ora cu biaha pa un pais den exterior.
