KRALENDIJK.- “Mi a komprondé ku e personanan ku a pone kònteinernan i baki mata riba tereno públiko no ta paga prekario”, diputado Hennyson Thielman ta kontestá riba pregunta di BONERIANO.
Na vários sitio riba nos isla por nota ku ta pone opstákulo riba tereno públiko. Na momentu ku hasi uso di tereno públiko mester paga derecho di precario. Esaki ta konta pa tur espasio públiko. Aparentemente esaki no ta e kaso, precario a bira ‘free for all’.
No tin kontrol
A bira un kustumber pa pone baranka i otro opstákulonan riba tereno públiko. Tin establesimentunan ku baki di mata, stul i mesa riba asera, na diferente sitio, prinsipalmente banda di Malekon. Si tira un bista dilanti di Stadion di Playa, regularmente ta mira kònteinernan situá.
Pues por konkluí ku no ta kontrolá esaki. Ta surgi e pregunta: Direktorado Supervishon i Mantenshon di Lei no ta kontrolá? Kiko ta e balor agregá di tin un regla si no ta mantené ni kontrolá?
Despues di hasi mas investigashon BONERIANO a komprondé ku den sierto bario tradishonal sí ta aserká e habitante na momentu ku e pone algu dilanti su porta di kurá, riba tereno públiko. Ta ki sorto di maneho e departamento di Entidat Públiko Boneiru (EPB) aki ta hiba?
BONERIANO a tuma kontakto ku departamento di Asuntunan Hurídiko i General (JAZ) pa sa si ta paga e derecho di precario aki. “Mi ta bai investigá esaki interno. Mi ta spera di por bin ku un kontesta denter di 2 siman”, Maritza Valdink ta bisa. E ta hefe di e departamento. E fotonan ta ilustrá opstákulonan riba tereno públiko.
