BOGOTA, AP.- Despues di mas di sinku dékada den selva di Colombia, e grupo gueriero mas grandi di e pais a kuminsá ku formashon di su partido polítiko den un sentro di konvenshonnan den e kapital i ku e promesa di krea un koalishon alternativo di iskierda.
Ainda mester anunsiá e nòmber di e partido di FARC komo parti di un akuerdo di pas históriko firmá aña pasa.
E akuerdonan ta garantisá e eks kombatientenan un total di 10 asiento den Kongreso i e mesun finansiamentu ku Estado ta proveé na 13 otro partido polítiko, ademas di e mei mion dòler di finansiamentu pa un sentro di pensamentu polítiko pa FARC.
E organisashon a bisa ku e lo mantené na su raisnan marksista i lo focus pa gana voto di e kampesinonan, klase trahadó i klase medio urbano ku un plataforma di hustisia sosial. Sin embargo, e grupo ta enfrentá oposishon di mayoria ku ta relashoná e gueria ku sekuestro i terorismo.
Un enkuesta den ougùstùs a determiná ku ménos di 10% di kolombianonan lo tin un konfiansa total den e rebeldenan komo partido polítiko, miéntras ku un mayoria amplio a bisa ku nunka lo vota pa un eks gueriero den Kongreso.
“Nan no ta bai haña un kaluroso bonbiní di mayoria di Colombia”, asina Adam Isacson a bisa, di sentro di estudio di Washington Office on Latin America.
