SABANAS DEL YARI, COLOMBIA, AP.- Un di e integrantenan di e liña di mando máksimo di FARC sigurá ku te ora promulgá un lei di amnistia pa guerieronan no ta kuminsá ku e proseso di desmobilisashon.
E plan pa rebeldenan kuminsá reuní den regionnan rural lo “kuminsá na momentu ku forma tur akuerdo ku gobièrnu, inkluyendo un lei di amnistia pa e guerieronan. Asina Carlos Antonio Lozada a indiká den un entrevista ku AP, na Sanabas del Yari, na sùit di e pais, kaminda e grupo armá ta realisando su último konferensia despues di bolbe bèk na bida sivil.
E komentario di Lozada ta similar na unu di Luciano Marin konosí komo Ivan Marquez, hefe di e ekipo negoshadó di FARC den e proseso di pas ku gobièrnu.
Na prinsipio a bai di akuerdo ku e desmobilisashon lo kuminsá na momentu ku firma e akuerdo final di pas entre presidente Juan Manuel Santos i e hefe máksimo di FARC, “Timochenko” dia 26 di sèptèmber na haf di Cartagena de Indias.
Sinembargo, mas despues FARC anunsiá ku ta sperando e resultado di referèndem dia 2 di òktober kaminda kolombianonan ta disidí si ta aprobá e akuerdonan ku a yega na dje na Cuba.
E minister di Hustisia, Jorge Eduardo Londono, a splika djamars ku e lei di amnistia ta “tramitá rápidamente” den Kongreso manera e resultadonan di voto bira konosí. E trámite di lei lo tarda no ménos di 15 dia, segun ekspertonan konsultá pa AP.
