MANCHESTER, NEW HAMPSHIRE, MERKA, AP.- FBI ta investigá si tin informashon konfidensial den e- mai lnan resien deskubrí relashoná ku e asuntu di e server privá di Hillary Clinton. Esaki ta bolbe highlight e situashon di Clinton kual ta un di e asuntunan polítiko mas toksiko den e kampaña presidensial den ménos di dos siman pa votamentu.
E e-mailnan nobo ta di un investigashon di ‘sexting’ di eks legislador Anthony Weiner, segun un funshonario federal ku a papia bou di kondishon anónimo paso e no tabata outorisá pa duna komentario na públiko. E kasá di Weiner, Huma Abedin, ta un eks asesor di Clinton ku aktualmente ta forma parti di su ekipo di kampaña.
Donald Trump a probechá di e akontesimentunan mesora, despues di mira e oportunidat pa reiterá e argumento ku e tabata presentando kontra Clinton. Esaki ta ku Clinton a pone seguridat di Merka na peliger dor di usa su server di personal pa asuntunan ofisial. E kandidato republikano a bisa na su partidarionan den su promé akto di kampaña di dia ku e tin ‘hopi rèspèt’ pa e echo ku FBI i departamento di Hustisia ta “dispuesto na buska e kurashi di korigí e eror horibel ku nan a kometé” dor di konkluí e investigashon aki.
E revelashon di djabièrnè atardi ta krea e posibilidat ku FBI ta bolbe kuminsá e investigashon kriminal kontra e kandidato presidensial demókrata, ku e agensia a bisa mester a terminá na yüli.
Den un karta mandá djabièrnè na lidernan di Kongreso, e direkshon di FBI James Comey a bisa ku algun mensahe elektróniko a bolbe paresé, kual a pone ku e agensia a “tuma pasonan pa un investigashon mas apropiá” pa asina revisá e informashon ku a pasa via un server privá di e-mail ku Clinton a usa na momentu ku e tabata sekretaria di estado.
E uso di e server di parti di Clinton tabata un di e vulnerabilidatnan di su kampaña pa Kas Blanku, republikanonan a primintí ku, asta si Clinton gana, nan lo sigui e investigashonnan aki. Clinton no a menshoná e asuntu durante su aparishon públiko pero el a atvertí na su partidarionan ku “Kualkier kos por pasa” algun dia promé ku kampaña.
