WILLEMSTAD.-No a sigui haña petroli na kosta di Kòrsou. Te 3 dia pasá tabatin algun pida chikitu, pero no ta nada partikular i despues di esei no a haña nada mas. Tim di kalamidat huntu ku tur aktornan prinsipal, boluntarionan i Carmabi lo sigui monitor e situashon. Na palabra Lesie Fer na kabes di e tim di Kalamidat di Kòrsou den deklarashon pa EXTRA.
Por bisa ku Kòrsou a skapa di loke por a bira un desaster ekológiko. E barku ku a lèk petroli den laman na altura di Trinidad a pone ku vários pais den Karibe a sufri daño. Hermana isla Boneiru tambe mester a hasi basta esfuerso pa tene su kosta limpi despues ku e petroli a yega e isla.
Leslie Fer a duna di konosé ku tur e timnan a vigilá tur área rondó di Kòrsou i sigur 7 Boka, Oostpunt i Parke Kristof pa wak si e petroli ta yega tera. Ayera tabatin hende ku a mira algu maron riba laman den área di Rif pero a resultá sargassum. A sigui vigilá tur área pa den kaso ku mester drenta akshon por hasi esei mesora. Pero danki Dios esei no a resultá nesesario.
Fer ta kere ku lo baha e intensidat awor ku kasi no a haña nada di mancha di petroli riba laman ni na tera. Nan tin informashon ku Boneiru mes no a haña mas rastro di e petroli.
E timnan lo sigui vigilá, pero ku ménos intensidat.
