BOSTON, AP.- Temperaturanan abou i friu a kubri kosta ost di Merka djabièrnè, na momentu ku e region tabata den un tarea di limpiesa kontra un tormenta masivo ku a laga mas di 30 centimeter di sneu i inundashon.
E meteorologonan ta pronostiká bientu fuerte i aire sumamente friu den e region, desde Atlántiko pa New England, pa fin di siman.
“Ta ekstremadamente friu”, asina Brian Hurley, di sentro di pronóstiko den Servisio Nashonal di Meteorologia na College Park, Maryland a bisa.
E koriente friu por duna sintimentu di 31 grado Celsius bou di sero desde Philadelphia pa Boston.
E tormenta a kuminsá algun dia pasá den Golfo di Mexico i a asotá Florida Panhandle. Pa djaweps, esaki a kousa káos i estado di emergensia a lo largo di kosta ost. E ráfaganan di bientu a yega 113 kilometer pa ora na algun parti i akumulashon di 46 centimeter di sneu.
E tormenta a obligá skolnan i negoshinan pa sera, kanselá òf redusí servisio di avion, trein i diferente blackout. Algun servisio di fèri a wòrdu será na e kosta kanades.
Djabièrnè aeropuertonan na nortost tabata reanudando nan servisio. E vuelonan desde i rumbo pa Logan International na Boston a bolbe funshoná poulatinamente i ta sperando ku e aktividat ta oumentá segun e dia ta sigui pasa. Un bosero a bisa ku e aeropuerto tabata sperando aerolíneanan pa manda nan avionnan pa e terminal.
