NEW YORK, AP.- E Fundashon karitativo di Donald Trump ta un tiki mas ku un mekanismo pa kastigá empresarionan rival i reforsá e imágen polítiko di e presidente, segun un demanda presentá djaweps pa fiskal di New York.
Fundashon Donald J. Trump “tabata algu mas entre otro komo un kartera pa pagonan personal di señor Trump òf su negoshinan òf organisashonnan karitativo, sin importá su propósito òf legalidat”, asina fiskal general di New York Barbara Underwood a bisa den e demanda, eksihiendo pa disolvé e organisashon i e pago di 2,8 mion na kompensashon.
E demanda ta indiká ku e fundashon a yuda finansiá e kampaña di Trump via e rekoudashon di fondonan den un evento televisá den yanüari 2016 i a permití pa personal di e kampaña disidí kon pa distribuí e plaka.
Den algun tweet mandá djaweps, Trump a kalifiká e demanda komo “ridíkulo” i a agregá ku e no kier yega na un akuerdo.
E mandatario, a bisa meskos na momentu di un demanda similar kontra Universidat Trump. Al final el a bai di akuerdo pa paga 25 mion dòler aña pasá na kompensashon.
Ni e abogado di e fundashon, Sheru Dillon, ni un bosero di e Organisashon Trump a rospondé na mensahenan pidiendo nan komentario.
E normanan di e fundashon ta stipulá ku su fondonan por wòrdu usá “eksklusivamente pa intenshonnan karitativo, Religioso, sientífiko, literario òf edukativo” sea direktamente òf atraves di otro entidatnan segun e demanda.
Kumpliendo ku loke e normanan fiskal federal ta eksihí, e normanan di e fundashon ta prohibí destinashon di rekursonan direkto òf indirekto pa benefisiá su maneho òf ehekutivonan, òf pa benefisiá un kandidato polítiko.
