BARI, ITALIA (AFP).- Dirigentenan dje shete demokrasianan mas riku di mundu a akordá na Italia un fiansa di 50.000 mion dollar na Ukrania, finansiá ku e aktivonan ruso blòkiá pa Oksidente.
“Mi ta konfirmá ku nos a yega na un akuerdo polítiko pa brinda un apoyo finansiero adishonal na Ukrania di mas o ménos 50.000 mion dollar te ku fin dje aña’ki”, segun Meloni, kende su pais ta anfitrion dje kumbre di G7 ku ta tumando lugá den zùit di Italia.
Meloni a invitá Zelensky pa uni na e grupo den un seshon spesial dediká na e guera di Ukrania, den presensia dje presidente merikano Joe Biden i e lidernan di Fransia (Emmanuel Macron), Alemania (Olaf Scholz), Canada (Justin Trudeau), Hapon (Fumio Kishida) i Reino Uní (Rishi Sunak). Union Europeo tambe a partisipá den e diskushonnan komo e di ocho miembro informal dje grupo.
Den un diskurso den e luhoso resort di Borgo Egnazia, den e region di Apulia, kaminda e kumbre a tuma lugá, Zelenski a gradisí e lidernan pa e apoyo i a bisa ku esaki lo sirbi “tantu pa e defensa komo e rekonstrukshon”.
Sinembargo, el a hasi un yamada na e aliadonan di Kiev pa bai mas leu i konfiská e aktivonan konhelá di Rusia, un opshon ku Union Europeo te awor a deskartá pa miedu di su konsekuensianan den merkadonan internashonal.
Tambe el a pidi mas sistema di defensa aéreo pa kontra arestá e ofensivo ruso ku a start den 2022.
Un funshonario haltu di gobièrnu di Biden a informá djaweps ku Merka ta dispuesto na pone te ku 50.000 mion dollar, pero ku e kontribushon ei por ta hopi mas abou si finalmente e bira un inisiativa kompartí ku otronan.
“Nos lo no ta e úniko pa fia. Nos mester bira un grupo ku ta hasi esei, nos lo parti e riesgo pasobra ta huntu nos tin e kompromiso”, segun e funshonario di gobièrnu merikano.
E kansier aleman Olaf Scholz a kalifiká e desishon komo “históriko”. Pareu ku esei, Merka a anunsiá un akuerdo di seguridat ku Ukrania pa e próksimo dies añanan, un “señal poderoso”, segun Washington di apoyo merikano kontra dje invashon.
Preshon na Hamas pa un tregua
Pareu ku tur esei, G7 a pidi ofisialmente na e movementu islamita palestino Hamas pa aseptá e ruta pa yega na un paro dje guera den Gaza, anunsiá pa Biden den luna di mei.
Konseho di Seguridat di Nashonnan Uní ta apoyá e plan “i awor ta importante pa tur hende implementá esaki”, segun Scholz. “Pa e motibu ei nos ta pidi partikularmente Hamas pa duna nan ole pa e kos aki por funshoná”, segun el a agregá.
Awe ta spera presensia na e kumbre, komo invitadonan ounke nan no ta forma parti dje grupo, dje presidentenan di Brasil, Luiz Inácio Lula da Silva, i Argentina, Javier Milei.
