BUFFALO, NEW YORK, MERKA, AP.- Un ‘gang’ internashonal di narkotrafikante ku tabata usa kònteinernan marká komo “sea cucumber” pa manda kokaina, heroina i otro droganan, balorá na miónes di dòler pa New York, via California i México a wòrdu kapturá, segun indikashon di outoridatnan federal.
E fiskal Willaim Hochul a bisa den un konferensia di prensa ku a akusá 17 persona pa kargonan federal di narkotráfiko i labamentu di plaka, komo su investigashon yamá “Operashon Tetanus”.
E gang vinkulá ku kartel di Sinaloa, México, tabata usa kompanianan na California i área di Buffalo, na nort di New York, pa kontrabanda supuesto kònkòmbernan di laman, usa den kushina chines, segun funshonarionan.
E atministrashon di Kòntròl di Droga a bisa ku e operashon a kapturá mas di 2,5 mion dòler di droga ilegal, ekivalente na 1,5 mion di kokaina i 2,7 mion di heroina, e narkonan a manda 20 mion dòler pa bankonan di área di Buffalo na California den un aña, segun informashon di outoridatnan.
E gang di narko a kombertí siudat di Buffalo den sentro di operashon di narkotráfiko di heroina i otro droganan na New York, segun James Hunt, agente spesial di DEA.
Fiskalnan a bisa ku e ganga forma kompanianan fiktisio di kuminda, inkluyendo un den suburbio di Cheektowaga, pa manda droga den e pais kompleto miéntras esakinan tabata skondé den kònteinernan seyá pa despistá outoridatnan.
