Plet ta konkluí:
WILLEMSTAD.- Miéntras ku minister di Finansa, Javier Silvania ta kontinuá di envolví Hulanda den asuntunan interno di servisio di impuesto, ainda e no a duna klaridat riba dikon e ta usa dunamentu di adelanto riba restitushon pa persiguí i humiá ámtenarnan. Kolaboradó di frakshon di MAN den parlamento, Yael Plet ta bisa ku aktitut di Silvania, esta di keda envolví Hulanda den asuntunan interno di servisio di impuesto ta demostrá su inkapasidat pa atendé ku e situashon.
“Ta hinka e problemátika spesífiko den man di un otro, pues no ta gobièrnu mes ta yega na e trayekto pa drecha servisio di impuesto”, Plet ta bisa. Na su opinion gabinete Pisas no tin e kurashon tampoko pa e mes atendé ku e situashon na servisio di impuesto.
Silvania despues di a informá Kolegio Supervishon Finansiero di su interpretashon di e ouditoria ku ofisina di akountent SOAB a hasi na Ontvanger, a risibí un kontesta di parti Van Huffelen ku ta bisa di ta apoyá pasonan ku ta tuma na ofisina di Ontvanger. Awor e minister a kontestá e karta di e sekretario di estado Hulandes manteniendo asina e envolvimentu di Hulanda bibu.
Den su karta e minister ta yama Van Huffelen danki pa su reakshon den kua e sekretario di estado ta ekspresá su preokupashon pa e ‘abusunan’ (“misstanden”) na ofisina di Ontvanger manera reportá den e ouditorianan interno ku SOAB a hasi entre 2021 i 2023. “Mi ta apresiá bo atenshon pa e tópiko importante aki i bo sosten pa e medidanan manera deskribí den e komunikado di 30 mart último”, Silvania ta skibi den un kontesta.
Apesar ku e minister no a duna klaridat ainda dikon e ta asina indigná riba e adelantonan ku ta duna riba restitushon, te ku e kier a retirá direktor di Ontvanger, puntonan ku diferente frakshon den parlamento ke klaridat riba dje ta si Silvania lo asumí su responsabilidat ministerial rondó di e lokual ku segun su persona ta bayendo robes mirando ku e informashonnan aki ta konosí for di 2022.
Tambe ke sa si e minister lo bai aktua na bienestar di e hòmber chikí e biaha aki mirando ku e ta nenga entre otro di publiká kambio di lei di “onroerendzaakbelasting” i awor ke eliminá adelanto riba restitushon miéntras ku esaki ta un areglo no ofisial ku e hòmber chikí ta hasi uso di dje ora e ta den un pèrtá finansiero.
Den su karta pa Van Huffelen, Silvania ta sigui bisa ku e medidanan proponé manera traha i implementá un plan di mehorashon, pago bèk di adelanto, kaba di atendé ku kasonan di debe di impuesto, kontinuá i intensifiká kontròlnan interno, institushon di un punto di notifikashon pa pagadónan di impuesto i lansamentu di un kampaña di informashon, tur ta pasonan den e bon direkshon. Ta trata di medidanan riba término kòrtiku i mediano na kaminda pa reformanan struktural di servisio di impuesto i e sistema di impuesto manera deskribí den e pakete di pais, Silvania ta splika.
“Ku realisashon di e reformanan struktural aki e tipo di abusunan manera konstatá lo ta algu di pasado. Ku e pakete di pais i e areglo mutuo, nos lo traha huntu na realisashon di e reformanan ya menshoná di kua e aktividatnan mas prinsipal ta menshoná den e agènda di ehekushon.”
Finalmente e minister di Finansa ta bisa ku e ta sostené proposishon di van Huffelen pa inkluí e puntonan di akshon den e agènda di ehekushon di e pakete di pais. Silvania ta proponé pa e komishon nashonal di reforma i e organisashon temporal di trabou (“tijdelijke werkorganisatie”) deliberá riba kon ta hinka e puntonan di akshon aki den e agènda di ehekushon i ku ta presentá e resultadonan na mandatarionan konserní.
Plet ta splika ku den e pakete di pais no a ehekutá mayoria punto di akshon riba e tema di impuesto, manera integrashon di servisio di impuesto, ofisina di Ontvanger i BAB den 1 solo organisashon. “E karta aki ta mustra ku gobièrnu ta skohe pa kue su responsabilidat duna na otro i ku e kurashi pa tuma akshon no t’ei.”
