BOGOTA, COLOMBIA, AP.- E gobièrnu kolombiano a atribuí un konfrontashon ku FARC komo un eror. Esaki tabata unu entre ehérsito i e gueria kaminda vários rebelde a resultá heridá.
” Den e insidente lamentabel di 8 di yüli ta un eror di parti di FARC debí ku nan tabata na un sitio robes”, segun Humberto de la Calle, hefe di e ekipo negoshadó di gobièrnu den e proseso di pas ku FARC.
Djadumingu, minister di Defensa, Luis Carlos Villegas, sitá pa e emisora lokal RCN, a sostené ku e insidente e tuma lugá djabièrnè na momentu ku ” outoridatnan tabata realisando kontròlnan teritorial den e zona i a konfrontá ku e insurgentenan ku tabata den e sektor”.
El a agregá ku “segun FARC, e kombate aki a laga tres gueriero heridá. Nos a ofresé pa brinda nan tur atenshon nesesario ku koordinashon di Komité Internashonal di Krus Kòrá”.
Segun De la Calle, no ta bèrdat ku outoridatnan no a presta yudansa humanitario na e rebeldenan heridá, manera un komandante gueriero a afirmá anteriormente.
E hefe máksimo di FARC, Rodrigo Londono alias “Timochenko” a sigurá ku “tabatin un eror humano i nos ta rekonosé esaki”.
Den deklarashonnan na e kanal di Internèt NC Noticias, e komandante rebelde a kontradesí minister Villegas i a komentá ku “no ta bèrdat ku tabata un kombate e di enkuentro i no ta bèrdat ku esaki tabata un eror eksklusivamente di FARC”.
Timochenko tabata enfátiko afirmando ku e proseso di pas ta sigui pero ku loke a pasa djabièrnè ta un elemento negativo i ta mustra ku tin algun persona ku kier reta e proseso di pas i ta probechá di kualkier sirkunstansia pa generá provokashon.
