LONDON, AP.- Promé minister Theresa May a bisa djamars ku e lo purba posponé e salida britániko di Union Europeo i kier yega na un akuerdo ku oposishon pa sali di e impase.
May a hasi e anunsio despues ku e negoshadó di UE a atvertí ku Brexit lo resultá kaótiko i kostoso dentro di e próksimo 10 dianan benidero, si Gran Bretaña no logra sali for di e krísis polítiko ku a paralisá gobièrnu i Parlamento.
Despues di un reunion di gabinete ku a dura shete ora, May a anunsiá un ‘mitigashon; signifikativo den e akuerdo pa Brexit.
Algun ora promé ku e deklarashon di May, e negoshadó di UE Michael Barnier a presentá su evaluashon pesimista na legisladornan europeo miéntras e gabinete britániko ta purba elaborá un proposishon nobo pa presentá na London despues di e derotanan di e gobièrnu su plan i un serie di alternativa.