WASHINGTON, AP.- Visepresidente Mike Pence a pidi Venezuela pa liberá seis ehekutivo petrolero merikano inmediatamente. Nan tin mas di un aña enkarselá den e pais suramerikano sin ku nan a wòrdu demandá formalmente.
E prezunan ta “detené ilegalmente” pa presidente Nicolás Maduro, segun indikashon di Pence.
Sinembargo, el a atmití ku no ta probabel ku nan ta sali den libertat miéntras Maduro ta na poder.
Pence a hasi e komentarionan despues ku el a reuní ku famianan di e prezunan na Kas Blanku, kende tabata traha pa Citgo, e filial merikano di PDVSA. Nan a wòrdu arestá den novèmber 2017 i ta wòrdu akusá pa malversashon, despues ku nan mester a reuní na Caracas supuestamente pa un reunion di último ora.
Merka i mas di sinkuenta pais mas no ta rekonosé e gobièrnu di Maduro konsiderando ku e elekshonnan tabata ilegal. na lugá di esaki, nan ta rekonosé e opositor Juan Guaidó, presidente di Asamblea Nashonal komo e presidente legítimo di e pais.
