ROSETTA, AP.- Sobrebibientenan, algun di nan mará na kamanan di hospital, a konta di a mira muhé i muchanan hogá ora un barku di mas kargá ku migrante a senk na kosta di Egipto, na momentu ku outoridatnan egipsio a bisa ayera ku nan a haña 51 kadaver i gruponan no gubernamental ta kalkulá ku mas di 100 persona ta sigui pèrdí riba laman.
Piskadónan i barkunan tabata esnan promé ku a yega na e área, asina un funshonario egipsio a bisa, miéntras ku a tuma wardakosta mas di 5 ora pa yuda e piskadónan na reskatá e personanan ku ainda tabata a bida i tambe rekuperá kurpanan.
E noufragio por ta un di e insidentenan mas kruel riba e ruta di migrashon atraves di mediteráneo. Sinembargo no sa ainda e kantidat, te ora sa kuantu hende tabatin riba e barku i ora por saka mas kadaver posibel di laman na e kosta.
Ta papia di entre 250 pa 600 persona ku lo tabata den e barku. E sobrebibientenan a bisa ku mayoria di e mortonan tabata hende muhé i muchanan. E organisashon internashonal pa migrashon a indiká ku e barku tabatin 350 migrante pero a atvertí ku e sifra ta un kalkulashon, di akuerdo ku e bosero Joel M. Millman na Roma. E no a bisa kon el a yega na e sifra ei.
