NEW YORK, AP.- Dos organisashon hispániko di promoshon di negoshi ta den un bataya legal pa e persona mas repudiá pa mayoria hispániko: e kandidato republikano pa presidensia Donald Trump.
E koalishon di Kámara di Komersio Hispániko di estado di New York a demandá kámara di Komersio hispániko di Merka pa ekspulsá esaki di e grupo. Un di e motibunan di kanselashon di su miembresia, segun e demanda, ta pasó e presidente di koalishon a keha públikamente ku e lider di kámara nashonal a reuní ku Trump. E demanda hasí na korte federal di Manhattan, ta indiká ku e desishon di Kámara di anulá miembresia di e Koalishon di su konstituyentenan tabata un forma di “represaya” i “ku ta violá e spiritu demokrátiko implísito den términonan di e kontrakt entre ámbos institushon”.
Algun tempu pasá Trump a indiká ku entre inmigrantenan mehikano tin violadó i delinkuente ku ta hinka droga den Merka. Un di e basenan di su kampaña elektoral ta e proposishon di krea un muraya na frontera entre México Merka pa para inmigrashon ilegal.
Javier Palomarez, presidente i direktor ehekutivo di kámara, a reuní ku Trump den sèptèmber na 2015 na New York.
