RICHMOND, VIRGINIA, MERKA, AP.- Despues di e promé debate presidensial, ta turno pa e dos kandidatonan pa visepresidente okupá sentro di esena. “E debate visepresidensia di djamars lo ta e úniko biaha ku Mike Pence i demókrata Tim Kaine ta tuma atenshon di votadónan, sin presensia di kandidatonan presidensial.
Esaki lo permití e kandidatonan ménos konosí pa presentá nan posishon den un oudiensia nashonal.
E kompañeronan di fórmula no ta sali for di sombra di kandidatonan presidensial, ounke Sarah Palin si a kousa sensashon komo esun designá di John McCain na 2008. Pero e votadónan tin motibu pa konosé ken por tuma presidensia den kaso di morto òf si esaki no ta kapas pa goberná.
E kandidatonan di 2016 tin edat mas haltu ku esun promedio. Ounke dòkternan a bisa ku nan ta den bon kondishon pa ehersé e kargo, Hillary Clinton, ku ta kumpli 69 aña promé ku elekshon, tabatin problema di salú den último añanan. Di su parti, Donald Trump di 70 aña, a revelá masha poko di su estado di salú.
Pence a focus riba e debate di manera radikalmente diferente ku esun di Trump, ya ku el a prepará kuidadosamente.
E gobernador di Indiana i eks legislador a realisá simulashonnan di debate ku e gobernador di Wisconsin, Scott Walker, studiante temanan ku probablemente por surgi i segurando di evitá krítika di falta di preparashon. “Nos ta bai hasi tur loke nos por pa asina prepará mas mihó posibel”. Asina Pence a bisa den un programa di radio.
E kompañero di fórmula di Clinton, un eks gobernador di Virginia i senador, a dediká vários dia di preparashon pa e debate, ku lo tuma lugá den universidat di Longwood, na wèst di Richmond.
