WASHINGTON, AP.- Kámara di Representante a vota pa manda un medida di 4.600 mion dòler pa Presidente Donald Trump. E plaka ta destiná pa atendé ku e migrantenan detené na frontera na sùit di Merka.
E proyekto di lei di emergensia, nesesario pa mehorá e mal kondishon den instalashonnan federal kaminda e migrantenan ta detené, a wòrdu aprobá pa un votamentu bipartidista di 305-102.
Diferente demókrata liberal ta kontra e proyekto di lei, i mayoria demókrata tampoko no a respaldá e presidente di Kámara di Representante, demókrata Nancy Pelosi.
E proyekto di lei ta inkluí mas di 1.000 mion dòler pa refugio i alimentashon pa e migrantenan detené pa Patruya na Frontera i kasi 3.000 mion dòler pa atendé ku e muchanan migrante sin kompaño i entrega na Departamento di Salu i Servisio Humano.
Sinembargo, e proyekto ta rechasá e petishon di gobièrnu pa pone mas kama di detenshon den Servisio di Kontròl di Inmigrashon i Duana i ta kontené algun klóusula diseñá pa impedí ku agentenan federal di inmigrashon ta persiguí inmigrantenan ku ta biba ilegalmente den e pais i ku ta purba atendé ku e muchanan ku e yega Merka sin kompaño.
E finansiamentu ta urgente pa evitá ku e emergensia humanitario na frontera entre Merka i México ta sigui empeorá. E gobièrnu a atvertí ku e plaka lo kaba den algun dia.
