MOSCOW, AP.- Algun siudat i pueblo ruso a wòrdu afektá pa huma diki di Siberia i Ekstremo Oriente. E kandela a propagá riba terenonan apartá.
Mas di 30.000 kilometer kuadrat ta na kandela, i mayoria ta den zonanan ku akseso difísil i kaminda e daño ta probablemente ménos di loke lo kosta pa kombatí e kandela, segun indikashon di Avialesookhrana, e servisio ruso di protekshon den e área,
Ounke e kandela no a yega den zonanan pobla, e huma denso ku esaki ta produsí ta afektá 800 komunidat, segun outoridat, inkluyendo siudatnan grandi di Novosibirsk, Krasnoyarsk i Chita.
Videonan transmití na un kanal di televishon ruso ta mustra avionnan tirando awa riba e kandela ku a generá huma meimei di un gran kantidat di palu. Bomberonan riba tera a spùit awa riba loke a sobra di e kandela.
Outoridat a deklará estado di emergensia den region di Irkutsk, Buryatia, Sakha i Krasnoyarsk.
Ehérsito ruso a uni forsa ku esfuersonan di kombate, proveyendo helikòpter i avionnan di transporte. Sin embargo, aktivistanan ta di opinion ku e gobièrnu no ta tumando sufisiente medida i diferente persona a manifestá den e Ministerio d Rekurso Natural.
