KINSASA, REPÚBLIKA DEMOKRÁTIKO DI CONGO, AP.- E kasa i yu di 1 aña di un víktima di ébola ku a muri den siudat Goma e siman aki, na Repúblika Demokrátiko di Congo, tambe ta sufriendo di e enfermedat aki, segun outoridat a konfirmá djárason.
Ta trata di e promé infekshon di e vírus den e pueblo na frontera ku Ruanda. Esaki ta un situashon ku mayoria eksperto di salu a teme p’e.
Ruanda a sera su frontera ku Congo brevemente den un siudat ku mas di 2 mion habitante miéntras e tareanan pa haña, registrá i vakuna personanan ku tabatin kontakto ku e hòmber aki, i kontakto di e kontaktonan.
E hòmber a muri djárason, despues ku el a pasa vários dia den un kas ku diferente famia mas miéntras e tabatin e síntomanan aki. Outoridat di Congo a bisa ku e famia kompleto a na kore un rísiko grandi di pega ku e vírus i ta den karentena. E koordinadó di ébola den provinsia Kivu Nort, dòkter Aruna Abedi, a konfirmá e infekshon di e víktima su kasa i yu muhé.
E brote aki a mata mas di 1.800 persona, kasi un terser parti di nan ta mucha.
