ADEN, YEMEN, AP.- Por lo ménos 51 persona a muri i diferente mas a resultá herida djaweps despues di un atake ku misil i atentado suisidio koordiná den e siudat di Aden, na sùit di Yemen, segun indikashon di funshonarionan.
E misil a alkansá Breiqa, kaminda tabatin un desfile militar di forsanan di Emirato Árabe Uni, miembro di e koalishon ku Saudi Arabia ta manehá pa lucha kontra e rebeldenan huti na nòmber di e gobièrnu di Yemen rekonosé pa e komunidat internashonal for di 2015.
E atake ku misil a mata por lo ménos 40 persona.
E desfile a tuma lugá riba e kampamentu al-Gala, ku ta sostené e koalishon, segun indikashon di un funshonario di seguridat ku no a duna mas splikashon tokante e víktimanan.
E rebeldenan a tira un misil kontra e desfile i kousa vários víktima, inkluyendo komandantenan, segun splikashon di e general di brigada Yehia Sarea, bosero di e rebeldenan, den un deklarashon publiká pa website di e grupo, Al-Masirah.
Segun un funshonario di salu di Yemen, e atakenan di djaweps a kousa por lo ménos 56 herido tambe. E dos personanan responsabel pa e informe a papia ku kondishon pa keda anónimo.
