LOWE LAKE, AP.- Un kandela hopi grandi a kima 4 kas i a kousa evakuashon di mas di mil habitante di un zona pegá ku e lago na nort di California. Outoridatnan a ordená e evakuashon di algun 500 kas i 1200 habitante miéntras e kandela tabata menasando sùit di e pueblo di Lower Lake. E kandela a kubri ayera djadumingu un grandura di 3,2 kilometer kuadra. Ekiponan ta trahando bou di kalor intenso i un dia poko nublá kombatiendo e vlamnan asina grandi ku ta for di nan kontrol.
“E aktividat di e kandela por kambia den kualke momentu”, asina Suzie Blankenship bosero di e ofisina di protekshon di mondi i kandela di California a bisa. E kandela a ekspandé rápidamente debí ku e zona aki ta hopi seku debí na e sekura históriko den henter e estado, asina funshonarionan a bisa.
E zomer aki kandelanan grandi i eksplosivo a aparesé den e área seku i difísil di atendé kuné den henter California, inkluyendo kandelanan serka di e zona na kosta di Big Sur ku a destruí mas di 60 kas i 182 kilometer kuadra for di fin di yüli.
Ta spera temperaturanan hopi haltu e siman aki na California. E por subi seis grado mas riba loke ta normal na sùit di e estado. Tambe nan a atvertí e pueblonan nort di California pa bientu fuerte ku por oumentá e peliger di kandela.
Den e bario di Lake e kandela ta menasa kasnan di 3 mil persona den un supdivishon i a bisa nan pa nan keda atento pa si nan tin di bandoná esakinan, asina Blankenship a indiká.
