SAN BERNARDINO, CALIFORNIA, MERKA, AP.- Un kandela feros den parti ost di Los Angeles a kima vários kas despues di avansá den serunan i desierto. E kandela tin un midí di 127 kilometer kuadrat. Outoridat ta determinando ken ta doñonan di e propiedatnan afektá. Bomberonan ta purbando di paga e siniestro meimei di temperatura haltu, klima seku i hopi bientu kual segun pronóstikonan lo mester a kontinuá te anochi.
Esei a laga esnan evakuá den un limbo kruel, obligando nan pa pasa un anochi mas sin sa si nan pertinensianan a wòrdu afektá.
Un di esnan evakuá ta Shawn Brady, kende a skucha un di su bisiñanan bisa ku e kandela a yega den su área. Pero Brady ta wardando konfirmashon ofisial.
“Loke mi a tende ta ku e kandela ta pasando rápidamente den área di mi kas”, asina Brady a bisa kende ta bewaker i ku ta biba huntu ku su mama, ruman i su kachó.
Funshonarionan di bombero di e kondado di San Bernardino solamente por a konfirmá ku algun instalashon a kima. Tambe nan a agregá ku e dañonan probablemente lo ta haltu.
Bomberonan a purba establesé un punto di yudansa pa kontrolá e kandela e siguiente dia ku e kandela a kuminsá. E vlamnan a kuminsá pa motibunan deskonosí na Cajon Pass, serka di karetera interestatal 15, un kaminda vital entre Los Angeles i Las Vegas. E kandela a wòrdu kontené pa 4% djárason.
