WILLEMSTAD.-E kompania di aviashon venezolano Avior ta reanudá su buelonan entre Caracas i Kòrsou. Despues ku a habri frontera bèk, poko poko por mira ku kompanianan di aviashon ta kuminsá bula atrobe. E ruta entre Caracas i Kòrsou semper tabata unu ku hopi tráfiko. Avior ta anunsiando ku dia 4 di oktober próksimo e promé buelo ta yega Kòrsou atrobe. E kompania Avior ta bula mas tantu buelonan interior pues den Venezuela mes e.o Porlamar, Barcelona, Caracas, Maracaibo, Las Piedras i Barquisimeto. Buelonan internashonal ku nan ta realisá ta Republica Dominicana i Kòrsou.
Riba website di Avior por tuma nota kon nan ta hasiendo promoshon di biahenan ida i buèlta pa Kòrsou pa algu mas ku $200.
Avior tabata bula un tempu kaba pa Kòrsou pero a stòp. Na yanüari 2018 Avior a stòp buelonan. Despues ku frontera a habri atrobe por a tende e nòmber Avior figura entre e kompanianan ku a mustra interes pa bula entre Kòrsou i Venezuela. Pa turismo di Kòrsou ta importante si por konta ku mas kompania di aviashon stabil riba rutanan atraktivo.
Den pasado e problema tabata ku tur kompania di aviashon mester warda te ora ku Cadivi ku ta e outoridat di aviashon venezolano disidí na los pagonan di e kompanianan di aviashon ku ta bula riba teritorio venezolano. Tin algun kompania di aviashon di Kòrsou ku a bati bankrut sin haña sèn di Cadivi.
Dia 4 di oktober awor ta otro fecha interesante pa aviashon i spesialmente pa Avior ku ta reanudá su buelonan entre Caracas i Willemstad.
