WILLEMSTAD.- E kompania krusero Royal Caribbean Cruise Lines a disidí di kambia un krusero basa riba bishita na kanal di Panama, pa un krusero den Caribe ku ta inkluí Kòrsou i Aruba pa 2024. Ta trata di e barku krusero ‘Rhapsody of the Seas’. Tur esnan ku a buk kaba, a keda notifiká, asina wèpsait NoticaCla ta skirbi awe.
E plan tabata pa Rhapsody ofresé un ‘cruise’ di 7 dia dor di kanal di Panama ku ta kuminsá i terminá na Panama. E tabata un idea nobo pa ofresé un krusero hopi solisitá sin mester komprometé un krusero di 2 siman. No a duna un motibu spesífiko pakiko a kanselá e idea di e krusero ei.
Un e-mail di e kompania ta bisa solamente ku ta pa oumentá e eksperensia di e turista, a ahuste e ruta pa e krusero di 16 di mart 2024, unda ku awor lo hasi un krusero di 7 dia den e parti sur di Caribe. E barku awor lo pasa Kòrsou i Aruba i adishonalmente para na Cartagena, Colombia.
