Mama i yu(18) di Karibe
NEW MEXICO.(USA)-Awe mainta 3 sivil a bai den espasio na bordo di e nave Unity di Virgin Galactic. Ta pa promé bia den historia ku 2 hende di Karibe, komo sivil, ta bai den espasio. E di tres pasahero ta un merikano di 80 aña di edat, asina e kanal merikano NBC a mustra un ratu pasa.
Manera indiká ta trata di un biahe históriko ku 3 sivil na bordo di Virgin Galactic ku a lanta awe mainta for di su sede, den desierto na e estado merikano New Mexico. E yu muhé ta Anastatia Mayers i su mama Keisha Schahaff. E mama a bisa ku e ke wak e bista espektakular di mundu for di órbita i tambe wak e ekspreshon riba kara di su yu muhé na momentu ku nan ta bulando haltu den espasio. E di tres pasahero ta Jon Goodwin(80) ku ta den bataya kontra e malesa Parkinson.
Na 2021 e nave a bai den espasio pa promé bia ku su doño i su tripulashon di 2 hende, bulando na 53 mia for di mundu na un velosidat di 2300 mph. (foto kortesia NBC)
