NAIROBI, KENIA (AFP).- Por lo ménos 28 persona a muri na Kenia debí na áwaseru torensial komo tambe inundashonnan ku ta bati e pais for di luna di mart i sin ku tin señal ku esaki ta stòp.
Kenia i otro paisnan den parti ost di Afrika tin simannan largu ta sufri di fuerte áwaseru i esaki mas ku ta normal debí na efektonan di e fenómeno di El Niño.
E situashon di wer a provoká inundashon i skuifmentu di tera, a destruí kosecha i kasnan, i a pone ku algun shen mil hende mester a muda.
Segun un ehekutivo di gobièrnu, por papia kaba di 228 morto i 72 hende di kua no sa nan paradero. Mas di 212.000 hende a haña nan ta kambia di sitio i esaki sea di forma boluntario òf fòrsá, segun e bosero di gobièrnu, Isaac Mwaura.
Ministerio di Interior dje pais a ordená pa tur hende ku ta biba serka dje riunan grandi òf dje 178 damnan enorme ku ta kompletamente yená ku awa, pa nan evakuá e zona. Gobièrnu a atvertí ku ainda ta spera mas áwaseru torensial, ku riesgo riba mas inundashon.
Den parti wèst, e riu Nyando a krese i den oranan di djadumingu mardugá, i a lastra bai ku un warda di polis, un skol, un hospital i un merkado dje siudat Ahero. No tabatin informashon di víktimanan, pero polis a duna di konosé ku nivel di awa ta sigui subi i esei ta hasi e situashon mas grave.
Mas aleu bosero di gobièrnu a atvertí riba riesgonan di enfermedatnan transmití pa awa, manera ta e kaso ku kólera i kasonan di diarea.
