MARACAIBO, VENEZUELA (AFP).- Manuel Rosales añanan atras rival dje tempu ei poderoso Hugo Chavez den 2006, i awe gobernador dje estado petrolero di Zulia, ta bisa ku oposishon por derotá presidente Nicolás Maduro, pero mester ofresé esaki “garantianan” despues di un eventual salida for di poder.
Rosales (Santa Bárbara del Zulia, 71 aña) pa algun ora tabata aspirante pa e elekshonnan presidensial di 28 di yüli benidero, meimei di yobida di krítika ku a lanta debí na miedu di kiebro dje forsa di oposishon. Nan a yam’é traidor i Judas.
El a defendé su mes bisando di “a buska pa salba e ruta pa yega elekshon” na momento ku a blòkiá e inskripshon di Corina Yorias, promé opshon dje koalishon di Plataforma Unitaria, elogio komo sustituto pa e lider Maria Corina Machado.
Finalmente ta Edmundo González Urrutia a keda postulá i Rosales a renunsiá na su kandidatura.
“Ami a bisa ku e kandidatura, e boleto ta na órden i m’a kumpli”, segun el a duna di konosé na AFP den un entrevista den su ofisina situá den kas di gobièrnu di Maracaibo, Zulia.
Por gana di Chavismo
Ounke ta spera un “guera for di proporshon, shushi, hopi sla bou di faha” den e elekshon benidero, den kua Maduro ta aspirá un i tres mandato pa e por keda 18 aña na poder, Rosales ta sigurá ku: “Por gana di chavismo. “Nos ta bai logra un viktoria importante pasobra no por skonde e situashon polítiko, ekonómiko i sosial di pais”.
No opstante, e ta insistí den un “negoshashon serio” pa un transishon. “Lubidá e asuntu ku un dia un ehérsito lo yega pa invadí Venezuela i salba nos”, segun e polítiko, ku no ta na fabor di e sanshonnan internashonal kontra dje pais.
“Ku esei mi ta identifiká mi mes i m’a gusta e diskurso di nos kandidato (Gonzalez) ora ku el a bisa di ke kana e kaminda di pas, e kaminda di re-enkuentro i ku e ta alehá su mes di persekushon, di pasamentu di faktura i dje proseso violento”, segun el a bisa.
E ta kompleto di akuerdo ku “e proposishon hopi interesante” di un referendum, presentá pa e presidente kolombiano, e iskierdista Gustavo Petro, ku kende el a reuní na momento ku ainda e tabata kandidato, un enkuentro pa kua el a haña hopi krítika.
