WILLEMSTAD.- Komunidat di Kòrsou mensualmente ta fia algu mas ku 4.5 mion riba merkado di kapital. Esei ta loke por konkluí for di informenan prosedente di Banko Sentral di Kòrsou i St. Maarten. Segun e informashonnan di e instituto aki e dos paisnan huntu ta fia un promedio 6.2 mion pa luna riba merkado, di kual Kòrsou ta sobresalí ku 4.55 mion pa luna. E fiansanan aki ta ser repartí den diferente kategoria: fiansa pa gobièrnu i fiansanan privá ku ta konsistí di e.o. hipotek, fiansa pa konsumidó, fiansa komersial, i otro tipo di fiansa.
Den yanüari dje aña aki Kòrsou a fia 4.5 mion, den febrüari 4.51 mion, mart 4.52 mion, aprel 4.55 mion, mei 4.54 mion, yüni 4.57 mion, yüli 4.54 mion, ougùstùs 4.54 mion i na sèptèmber 4.55 mion. E fiansanan aki ta ser konsiderá komo fiansanan di sektor privá.
