IDOMENI, GRESIA, AP.- Ku Turkia den krísis i fronteranan di Oropa será, kontrabandistanan di persona na nort di Gresia ta rumbo pa un verano rendabel.
E trafikantenan ta usa método kada biaha mas sofistiká, pa saka e refugiadonan ku tin vários luna pegá na nort di Gresia, segun polis di e pais.
E preis kada biaha mas haltu di biahe klandestino i tiki posibilidatnan di éksito, no a baha e determinashon di migrantenan.
Sorah Rahimi, un studiante di sikologia di 22 aña a biaha for di Afganistan ku su mama, kende tin problemanan di salú i kende ta kliente ophetivo ideal di retnan di kontrabanda, di persona ku ta aparesiendo den e region. El a bai di akuerdo pa paga 2.500 euro na trafikantenan, pa biaha for di frontera di nort di Gresia ku Masedonia i Suesia pero por a avansá pa solamente algun kilometer, promé ku el lo ta deskubrí pa polis i debolbé riba teritorio griego.
“Nos mester bai Suesia. Tur nos famianan ta einan i no tin nada mas na Afganistan pa nos”. Asina Rahimi a bisa na AP, promé ku el a keda trasladá pa un refugio pa migrante na nort di Gresia. Desena di míles di migrante a keda pegá riba nan biahe pa nort di Oropa. E gobièrnunan di vários pais a sera frontera den mart pa evitá e situashon di 2015, na momentu ku mas di un mion refugiado i migrante a yega, rebibando e tenshonnan polítiko den e regionnan aki.
