PARTIDONAN TA BON RISIBI DEN BARIO I TIN HOPI PREGUNTA DI VOTADO
WILLEMSTAD.- Kontrali na e tambú di fin di aña ku a ekspresá malkontentu pa e situashon aktual i a pidi pa manda kachó riba tur polítiko i gobernante ku yega den bario, partidonan ta bon risibí den e kampaña aktual. Kòrsou ta konosí pa su hospitalidat i hopi ta esnan ku tin hamber pa e informashonnan nesesario. Irónikamente e kantante di e tambú aki ku a kousa impakto tambe ta riba lista pa e próksimo elekshon.
Un sondeo ku EXTRA a hasi serka e diferente partidonan ku ta partisipá na elekshon a trese komo resultado ku nan no a topa un ambiente hostil den barionan. ‘Nos a topa hopi hende ku kier sa i ku a atendé nos riba e ‘issue’ nan ku pa nan ta importante. Den e temanan aki tin prinsipalmente enseñansa, seguridat (kriminalidat) i salubridat”, asina un di e partidonan a indiká. Hende ta para skucha kiko bo tin di bisa i nan ta hasi preguntanan, tin biaha preguntanan skèrpi. Nan no ta tuma kiko ku ta komo kontesta. Den algun kaso tin hende a indiká ku sea nan no ta vota òf nan sa kaba pa ken nan lo bai vota. Pero ningun kaminda realmente nos a topa hende ku a zundra nos òf a kore ku nos manera kisas tin e persepshon na e momentunan aki, asina a bin dilanti.
Un aspekto ku si a resaltá ta e echo ku hopi di esnan aserká den bario ta un poko dudá si realmente lo bin kambio. Diferente di e personanan den bario ta bisa ku den último añanan nan a haña bishita den tempu di elekshon di diferente partido ku e mesun promesanan. Den e kuadro ei e tin antipatia i apatia i e pregunta si realmente e partidonan lo bin ku kambio e biaha aki. Den bishita di un di e partidonan na Soto, e pregunta a bin duru den direkshon di e partido nobo. “Hopi a bin i hopi a bai sin bin bèk”, asina e komunidat kaminda tin hopi hende ta biba huntu a bisa e delegashon polítiko ku a bishitá e bario. Tur hende a tuma e paketenan amplio ku e partido a bin kuné, inkluyendo algun guitara pa e muchanan. Un reklamo konstante ta e echo ku hopi partido ta disparsé for di mapa despues di elekshon i no ta regresá mas sino te despues den e próksimo kampaña. Partidonan ku a primintí ku nan ta keda den kontakto ku pueblo i bario despues di algun siman despues di elekshon tambe ta laga slèk, asina a bin dilanti. Tur partido básikamente ta kana bario pa asina eksponé nan ideanan. E pensamentu ku awendia ku por hasi promoshon den korant, radio i televishon so no ta korekto. Diferente di e partidonan a bisa ku nan ta konsiente ku e kontakto direkto ta masha importante den kampaña. Por sierto ku tin partido ta pensa ku ta via di e sistema digital so lo alkansá e votadó. “Esei tambe ta inkorekto pasobra tin un grupo grandi di votadó ku no tin konekshon ku un kòmpiuter i ta kontakto direkto so por motivá nan pa vota”, asina un di e partidonan ta bisa.
Faltando tres siman mas pa e elekshonnan, ainda tin hopi hende na duda si nan lo bai vota i pa ken nan lo vota di manera ku e último fase aki ta masha importante pa asina trata di konvensé e votadónan aki. E enkuesta publiká e siman aki den EXTRA a indiká ku tin hopi duda ainda i e resultado lo por bai den tur direkshon ainda.
