WILLEMSTAD – Gobièrnu di Kòrsou, huntu ku Curaçao Airport Holding, a anunsiá awe ku ta bai krea e promé sistema móbil na mundu ku ta hasi verifikashon di ID digital durante e proseso di kòntròl di frontera posibel. Ku e sistema lo por ehersé e kontròl nesesario adelantá, pues promé ku e buelo tuma lugá. Esaki lo hasi e prosedura di kontròl di frontera mas fásil i lihé. E programa lo usa teknologianan “remote” i “in-person”, suministrá pa un kolaborashon entre Airside i Vision-Box. Airside ta lider den e merkado di sistemanan di identidat digital basá riba privasidat i Vision-Box ta lider mundiál den solushonnan di biométria. E sistema biométriko di verifikashon di ID digital aki, ku lo fasilitá e proseso di kòntròl di frontera, lo keda lansá durante e promé mitar di 2024. Den edishon di EXTRA mayan lo tin mas detaye.
