Kòrsou por benefisiá grandemente di Lei di Trust

Dr Katherine Filesia

Katherine Filesia a promové resientemente komo doctor den “Notarieel Recht”, despues di a defendé su PhD tésis éksitosamente na universidat di Leiden. Su tésis tabata titulá: “Speaking the Same Language: De invoering van de Anglo-Amerikaanse trust in het Nederlandse recht”. E investigashon di dr. Filesia ta trata di e figura ‘trust’ ku ta wòrdu usá internashonalmente den e mundu finansiero i kon pa implement’é den e sistema hurídiko hulandes. I Katherine ta na Kòrsou aktualmente kaminda el a partisipá den seminario i tambe lo keda pa algun siman pa mira unda mas e por duna un man. I naturalmente nos di Djasabra semper ta pone atenshon na kosnan positivo i na nos hendenan ku ta alsa nòmber di nos pais.

Eskoho di lei Notarial

Katherine a konta nos ku e no a kuminsá studia lei notarial, pero Rechts Geleerdheid. E tabata ke hasi lei internashonal i Oropeo i a bai Leiden. Den su promé aña e kier a sa mas di lei i a bai Rechtwinkel na Leiden. Einan e kier a hasi lei penal pa mira kua e  gusta mas ya ku den prensa ta tende hopi di lei penal. Pero e no a keda skohé pa duna un man den lei penal ounke si nan a aserk’é pa e departamento di ‘personen en familierecht’ i einan el a sera konosí ku lei notarial. Despues banda di su estudio di Recht Geleerdheid el a hasi lei notarial. Asina Katherine a hasi tur dos i ora e mester a skohe, el a mira ku e lei notarial tin di aber ku hende loke a hala su atenshon mas. Na Rechtwinkel e ta topa hende ku ta bin pa divorsio i tambe tèstamènt i esei a yama su atenshon muchu mas. E mester a skohe entre abogado i notario; el a kore stazje na Kòrsou den abogasia i notario i na Hulanda tambe el a kore stazje i asina definitivamente Katherine a skohe pa e lei notarial.

Ser habrí i asertivo

Katherine a bai Hulanda na 2009. E ta un hende hopi habrí i esei tabata su focus ora el a bai Hulanda. El a pone su dilanti ora el a bai studia afó, ku ta den un otro kultura e ta bai i pa bo logra bo tin di pone bo dilanti pa no lubidá di unda bo ta bin, pero siña dil ku esnan na Hulanda. Tabatin tempunan difísil sigur den e promé aña. Mayoria bia na Leiden e tèntamennan ta den e promé siman di yanüari, nèt despues di dianan di fiesta i hopi aña tras di otro, e promé seis aña sigur e no a bai Kòrsou. Tabata basta difísil pe. Na Hulanda bo tin di siña sali pa bo mes i ta asertivo. El a hasi esei i si e ke algu e ta bai pe i esei sigur a hasi su bida mas fásil.

Meskla ku tur nashon

E ta kompartí e pensamentu ku ora bai Hulanda komo yu di Kòrsou, no meskla solamente ku yunan di Kòrsou pero ku tur nashon. Esei ta bon tep segun Katherine. E tin amigunan yu di Kòrsou pero tambe internashonal i no solamente di Hulanda. Esei ta duna bu un bista mas amplio di mundu, bo ta siña di otro kultura i ta yuda bu den bo desaroyo. Esei ta algu ku e mes a eksperensia. Dia Katherine a kuminsá studia, el a hasié ku finansiamentu di estudio i el a haña yudansa tambe di su mayornan. E ta konvensí ku sin e yudansa di su mayornan e lo tabata mas difísil, pasobra si bo tin di bai traha e por hasi e estudio mas difísil. E djòpnan ku el a kue ta mas hurídiko i kisas un dia pa siman i na Rechtwinkel el a hasié komo boluntario.

Na Leiden den Rechtswinkel no tabatin hopi yu di Kòrsou. E tabata un di e eksepshonnan pero el a siña hopi trahando einan i a siña hopi komo yu di Kòrsou den e hulandesnan. Awor aki Katherine ta Kandidaat Notaris. Riba nos pregunta si e lo bin Kòrsou un dia, Katherine a bisa ku nunka e ta bisa nunka. E ta haña leuk si e por bin Kòrsou, pa yuda su pais.

Papia e mesun idioma

Katherine su tésis a hiba komo título “Speaking the Same Language: De invoering van de Anglo-Amerikaanse trust in het Nederlandse recht”. E tésis aki a wòrdu skirbí bou di guia di prof. dr. Pim Huijgen i prof. dr. Frans Sonneveldt. Banda di e dos profesornan ariba menshoná, prof. dr. Willem Zwalve tambe a duna su sosten. Interesante den e investigashon di dr. Filesia ta, ku el a usa e lei eksistente di Kòrsou, Landsverordening Trust, ku a drenta na vigor na aña 2012. Den e kuadro aki el a analisá e lei di Kòrsou profundamente i a deskubrí un kantidat di defekto i buraku aden.

Kòrsou ta un di e promé paisnan den reino hulandes ku na 2012 a introdusí e trust, i e lei di trust di Kòrsou ta basá riba e Aglo Amerikaanse Trust ku ta un lei merikano i ingles. Debí na esaki dr. Filesia a bishitá e prestigioso Universidat di Oxford na e instituto yama ‘Insitute of European & Comparative Law’, bou di guia di prof. dr. Birke Haecker, prof. dr. William Swadling i prof. dr. Lionel Smith. Durante algun luna el a optené na Oxford un amplio konosementu di e trust. A base di entre otro e investigashon aki i konosementu ku el a atkirí dr. Filesia a bin ku solushonnan konkreto pa repará e lei di Kòrsou i alabes proponé e introdukshon di e figura di trust den e legislashon hulandes.

Lei di Trust na Kòrsou

E idea pa hasi un investigashon den direkshon di Trust a kuminsá na Kòrsou. E lei a keda introdusí na Kòrsou na 2012 i Katherine a kore stazje na 2013 na Kòrsou. El a bai wak e lei na Kòrsou i a kompar’é ku esun di Hulanda i einan a wak e lei di trust ku ta un diferensia grandi. Hulanda no tin e lei di trust i Kòrsou si tin e. E ta algu ku ta wòrdu usá hopi den sektor finansiero mundialmente. E ta mira den práktika ku hopi kliente tin un trust. Por usa Trust den tur kos. Ta hasié pa protekshon di bienes i tambe si ke tene un kas den famia. Esei a pone ku e kier a sa mas di e tema aki i a kuminsá hasi su investigashon. El a bai universidat di Oxford na Inglatera kaminda e Trust a kuminsá. I den su buki e ta skibi un pida di dje na Inglatera kon e ta i kon tin di interpret’é i a bai kompar’é ku esun di Kòrsou. El a bai wak si e lei ta klòp aki kon tin di ehekut’é, i si e ta moderno i kon tin di introdusié na Hulanda. Hulanda no tin e asina Katherina a splika Djasabra. Durante di e investigashon el a ripará ku tin algun kos ku ta hasi ku e lei no ta kompleto òf no ta korekto. Asina dor di kompar’é i hasi investigashon na Inglatera i kompar’é ku esun di Kòrsou  Katherine a bin ku e solushonnan konkreto, kon tin di kambi’é. A base di loke el a drecha i solushonnan, el a ripará ku tin mas di 40 kos ku tin di drecha den  e lei i pa kada un el a bin ku solushon. A base di esei el a bisa ku si Kòrsou tin e, dikon Hulanda no ta wak algu asina aki ku ta interesante i wak riba esun di Kòrsou.

Kòrsou tin algu ku Hulanda no tin

Katherine a sigui bisa nos ku e lei di Kòrsou meskos ku e lei di St. Maarten, tambe e solushonnan proponé ta konta. I ta remarkabel ku no ta algu di Hulanda ku nos ta tuma pero ta algu ku Kòrsou tin i Hulanda no tin. E ta benefisioso pa Kòrsou si wak e klientenan ku ta bin Kòrsou pa e trust, ta hendenan di Merka, Canada, Sur Amérika, Sur Amérika i hopi ta usa un trust pa protekshon di bienes. E ta benefisiá Hulanda tambe, pero tòg nan ta hañ’é un figura basta difísil i hopi hende no sa kon e trust, esta e struktura ta traha. Kòrsou ke un produkto pa e propaganda internashonalmente p’esei a bin kuné. Pero Hulanda tambe tin nesesidat pa un trust asina. Pa Kòrsou e ta hopi moderno pero tin mas kos moderno den lei na Kòrsou ku hopi no sa di dje, segun Katherine.

Trust pa hende lokal tambe

Loke Katherine ke kambia ta ku nos hendenan na Kòrsou mes tambe ta usa e trust, ounke e ta basá pa hendenan ku ta bin di afó. E ta spera ora kambia e lei, hendenan di Kòrsou tambe por us’é. E tin hopi di aber ku asuntunan di impuesto. A introdusié pa klientenan internashonal i Katherine ta spera ku den futuro ora kambia lei, tur hende por us’é, lokal i internashonal. E ta un lei ku por hasi hopi kos kuné.

Atenshon di gobièrnu i parlamentarionan

Den su estadia awor na Kòrsou, Katherine ta spera ku e por papia ku gobièrnu di Kòrsou i tambe parlamentarionan pa wak kon mas lihé por kambia e lei. Esaki por krea kupo di trabou ya ku e hende ku ke krea e trust ta bai Notaris, e mester bai fiskalista, i e ofisinanan di trust mes tambe ta haña trabou.  E ta bon pa e klima di invershon pasobra por propagá un produkto internashonal, pa trese hendenan Kòrsou pa us’é. I den e kaso aki Katherine a bisa ku no mester wak solamente Hulanda i Oropa, pero mundu kompleto. Dor di kambia e lei por trèk hendenan riku ku por hasi uso di Kòrsou. E tin un spin off effect, pasobra bo ta trese mas hende aki pa usa nos kosnan lokal. E ta spera di por papia ku algun polítiko pa por kambia e lei mas pronto pa e sektor finansiero benefisiá. Den e 40 puntonan den e lei ku lo mester kambia, Katherine a splika ku e tópiko aki ta hopi tékniko pero den su buki el a splika ampliamente kiko presis mester hasi. E ta kere ku si por sinta na mesa e por splika. E mes  sòru pa skibi e lei kasi kompleto pa e por kambia mas lihé.

Investigashon di seis aña

Den su defensa di su tésis segun Katherine ku ta despues di un periodo di seis aña, e sa ku e ta sera un kapítulo di su bida. E tabata basta nèrvioso pasobra ora bai defendé bo tésis bo no sa ki pregunta bo ta bai haña. Pa 45 minüt e tin di defendé sin sa kiko pa spera.  Pero una bes e tabata den dje, e mes a skibi su buki i tabata sa tur kos den dje. Na Leiden pa 45 minüt ta sera porta pa defendé i despues un hòmber ku un pedal ta kana drenta i bisa Hora. E ta kontentu ku e por a pasa dor di dje. Te ainda el a haña reakshonnan positivo teniendo na kuenta e tema asina kompliká. Hopi ke lesa e buki i komo el a splika na un manera ku otro no a splik’é nunka, e ta hala atenshon. E ta keda aserká hopi di Hulanda mes tambe ku ke analisá e posibilidat pa introdusié einan tambe.

Tèstamènt ta importante

Katherine ta eksperensiá tur dia den su trabou riba tèstamènt. Tin hende ta pensa ku tèstamènt ta ku ta muri ta bai muri, pero tur hende ta muri un dia i si por regl’é ta bon pa hasié. Na Kòrsou tin hopi hende no ta traha tèstamènt i despues ku nan muri ta hopi drama tin i hopi kos no ta wòrdu reglá. Mester konsientisá hende ku no tur kos ta leuk den bida i tin kos ku mester regla. Un tèstamènt ta hopi importante.