PITTSBURGH, AP. – Djabièrnè un siudadano kubano a deklará su mes inosente di akusashonnan ku el a trama pa manda 900 deklarashon di impuesto falsu, ku ta pidi un reembolso total di 2,2 mion dòler.
Esaki e kier a hasi, usando datonan personal hòrta di e Sentro Médiko di Universidat di Pittsburgh.
Yoandy Perez Llanes, di 32 aña, ta ekstraditá siman pasá for di Venezuela.
Su abogado a bai di akuerdo pa detené e individual te ora e mester paresé dilanti di hues, pa motibu ku e por hui.
Llanes ta akusá den luna di yüni aña pasá ku dos individual mas pa kargonan di froude, labamentu di plaka i ladronisia di identidat den konspirashon.
Segun e dokumento, Llanes i por lo ménos tres persona mas a integrá un grupo ku tabata usa datonan personal di e hospital, pa risibí reembolsonan di impuesto den forma di krédito di ‘Amazon.com’. esaki ta un servisio ofresé pa e prosesamentu di impuesto ‘Turbo Tax’.
E kréditonan ta usá pa kumpra telefònnan selular, kòmpiuter, weganan di video i otro aparatonan, pa bolbe bende esaki for di Miami ku siudadanonan Venezolano di Maracay i Maracaibo.
