QUITO, ECUADOR, AP.- Latinoamérika a risibí e premio Nobèl di Pas di presidente Juan Manuel Santos di Colombia ku hopi entusiasmo. E pueblo ta spera ku esaki ta kontribuí pa pone fin na un konflikto armá di mas di sinku dékada den e nashon suramerikano.
Presidentenan, lider, aktivistanan i otro Nobèl di e region a felisitá e mandatario kolombiano, kende a kombertí den e di seis latinoamerikano pa risibí e rekonosimentu aki.
E Komité Norwega di Nobèl a otorgá e premio na Santos pa su esfuersonan di kaba ku e konflikto armá mas grandi den Latinoamérika. Esaki ta un rekonosimentu konsedé apénas sinku dia despues ku e kolombianonan a rechasá e akuerdo den un referèndem.
Promé ku Santos, e premio Nobèl di Pas a wòrdu otorgá na sinku latinoamerikano: argentinonan Car los Saavedra na 1936 i Adolfo Perez Esquivel na 1980; mehikano Alfonso Garcia Robles na 1982; kostarisense Oscar Arias na 1987 i e guatemalteko Rigoberta Menchu na 1992.
E komité Noruega a señalá ku e premio ta un “tributo na e pueblo di Colombia, ku a sera difikultatnan grandi i abusu.
E pais no a pèrdè speransa pa un pas hustu”.
E guera a laga mas di 220.000 morto i miónes di persona desplasá.
