…‘Nos estado di derecho ta na peliger’…
WILLEMSTAD.- Eks promé minister i baluarte di partido Nashonal, Maria Liberia-Peters ku resientemente a nombra komo minister di estado ta tristu i indigná ku e forma di proseder di e aktual gobièrnu di MFK/PNP relashoná ku kompra di e propiedatnan di sentro di prostitushon, Campo Alegre.
Den un “voice note” di Maria ku a lèk, por tende e èks promé minister di Antianan Hulandes papia di kurason tokante e kompra di e edifisionan ku un hende yega na dje i ku e ta referí na dje komo “mi yu”. Den su voice Maria ta bisa ku e no sa si e tin ku yama e kos aki un “zwarte pagina, pero mi no sa kiko ta pasando ku nos.”
E ta sigui bisa ku “e kos aki ta yena bo ku tristesa i bèrgwensa. Libertia–Peters ta bisa di por imaginá su mes ku un sierto momento un gobièrnu ta pensa ku e sitio ta stratégiko, serka di airport i ku por us’é pa diferente meta. Komo un shelter òf kas di kuido por ehèmpel. Loke Liberia-Peters no por komprondé sinembargo ta pakiko ta liderato di pais mester bai findishi pa “bid” riba e propiedat. E ta splika ku normalmente ta ámtenarnan, akountent òf abogado ta representá gobièrnu den tipo di kosnan aki.
Tambe Liberia-Peters ta para ketu na komunikashon di parti gobièrnu relashoná ku e kompra di edifisio i “feed back” ku iglesia katóliko tokante esaki. E ta bisa ku e ta imaginá su mes ku si gobernashon i asta iglesia tabatin un deklarashon pa prensa kla poné pa splika dikon a disidí di kumpra e tereno, anto nunka lo a haña e bochinchanan ku a surgi e dianan aki rondó di e kompra.
E kos aki ta yena Liberia-Peters su kurason ku tristesa komo eks gobernante i e ta puntra su mes ta kon ta sigui den futuro. Pa kolmo por a asta tende Ministerio Públiko tambe ta sali den prensa ta komentá, e baluarte di PNP ta bisa. Tumando tur esakinan na konsiderashon Liberia-Peters ta bisa ku un i tur por tuma nota ku nos estado di derecho ta na peliger.
E ta finalisá bisando ku e ta sinti su mes hopi tristu i hopi indigná.
