BOGOTA, COLOMBIA, AP.- E lider di FARC a bisa djaluna ku e derotá den referèndem tokante akuerdo di pas ku gobièrnu kolombiano “no tin efekto legal”. Den un mensahe di video kòrtiku, e hefe rebelde konosí komo Timochenko a reiterá disposishon di gueria di kumpli ku e kompromiso di tregua permanente.
Timochenko, kende su nòmber real ta Rodrigo Londono, a ninga ku e resultadonan di referèndem ta un derotá polítiko pasó e konsulta no ta hurídikamente vinkulante. El a konsiderá ku e akuerdo final a wòrdu firmá kaba i entregá na Konseho federal Suiso na Berna komo akuerdo humanitario spesial entre partinan den konflikto den marko di e Konvenshon na Ginebra. Gobièrnu a kuminsá un kumbre di partidonan polítiko djaluna pa asina buska un salida despues di e derota djadumingu.
Sentro Demokrátiko, liderá pa eks presidente Alvaro Uribe, tabata e impulsor prinsipal di e kampaña pa “no” i e opositor mas agresivo den negosiashonnan di pas ku ta tuma lugá ku gueria di Cuba.
Tantu Santos komo FARC, ku a yega na e akuerdo despues di kuater aña difísil di negosiashon, a primintí di sigui traha i práktikamente a deskartá e posibilidat di bolbe kuminsá un guera ku a laga 220.000 morto i ocho mion persona desplasá.
