BOGOTA, COLOMBIA, AP.- E asosiashon di empresanan transportadó di karga riba kaminda kalkulá ku tabatin mas di 500 mion dòler di pèrdida pa e paro di trùknan djabièrnè ku a yega na su di 39 dia. Asina presidente ehekutivo di Asosiashon Nashonal di Empresa Transportadó di Karga riba Kaminda, Jairo Herrera Murillo a informá. El a komentá ku pèrdidanan pa e wèlga a subi 1,5 bion peso kual ta kasi 513,1 mion dòler.
“Den e sifra ku a keda kalkulá ei solamente 60% di trùknan ku tin den e pais a stòp di traha”, segun Herrera a bisa den un entrevista ku The Associated Press.
Pa Rafael Meijia, presidente di e Sosiedat di Agrikultura di Colombia ‘loke ta mas frustrante ainda ta e echo ku tin kuminda ku a keda produsí, pero esaki no por wòrdu transportá pa sitionan di konsumo”.
E lider gremial, den kòmbersashonnan ku AP, a lamentá ku e enkuestanan hasi mas di un luna pasa a mustra ku e sektornan agríkola di e pais tabata subiendo. “Pero tur esaki ta bai para ku e paro aki. E luna di yüli lo ta un luna difísil”, asina el a opservá.
Andres Valenciia, presidensia di federashon nashonal di Avikultor di Colombia, a atvertí ku 200 mion para ta den peliger riba e teritorio kolombiano.
El a bisa ku den último dianan no tabatin un sakrifisio di para i a kalifiká esaki komo un problema di skarsedat di kuminda pa e animalnan.
E konflikto a eksplotá debí na un reklamo pa mihó preis i disminushon di preis di kombustibel entre otro eksigensianan.
