ITALIA, AP.- Un temblor nobo i mas poderoso den 35 aña a sakudí sentro di Italia ayera i a tumba edifisionan ku a resistí e mesun temblornan anteriormente i a provoká pániko entre e habitantenan ku a sali kore subi kaya. En prinsipio no a registrá niun morto.
E temblor di magnitut preliminar di 6,6 ta esun mas fuerte sinti mas fuerte den e pais den kasi 36 aña. E echo ku no tabatin morto ta debí ku hopi hende a bandoná nan kas for di siman pasá despues di dos temblor fuerte tambe den e mesun zona aki.
A reportá 20 herido hopi di nan ku leshonnan leve, asina outoridatnan a bisa. E kadena di Apeninos den sentro di Italia situá riba un seru a bin ta sufri hopi temblor. Dia 24 di ougùstùs último tabatin un di 6.1 ku a kousa 300 morto. E temblornan di djárason a laga míles di persona sin kas, pero e úniko morto ta debí na un atake di kurason.
“For di 1980 nos no a enfrentá temblor di e magnitut aki” asina e direktor di protekshon sivil Fabrizio Curcio a bisa. Na novèmber 1980 tabatin un temblor magnitut 6.9 den e region di Napoles ku a kousa 3 mil morto. E habitantenan yen di miedu pa temblor konstante a kore subi plasa i kayanan ora djadumingu mainta tempran nan a keda lantá pa e temblor.
Curcio a bisa ku outoridatnan a akudí ku yudansa den helikòpter, ya ku hopi kaya tabata será. Algun 3600 persona ya a keda mandá pa kosta despues di e temblor di siman pasa i e evakuashon lo sigui asina Curcio a bisa.
E poblashon mas serka di e episentro tabata e siudat antiguo di Norcia, patria di San Benito, e tata di monastesismo i famoso pa su monasterio benediktino. Testigunan a bisa ku e katedral di San Benito di siglo XIV a keda kasi kompleto tumbá.
“Ta manera henter e siudat tabata bai basha den otro”, asina e funshonario munisipal Giuseppina Perla a bisa na prensa. E murayanan antiguo a sufri daño, meskos ku otro iglesianan di e lugá manera esun di Santa Maria Argentea konosí pa siglo XV.
Riba televishon por a mira imágen di sùrnan ku a kore sali subi e plasa prinsipal i e toren di e kampana tabata na punto di bin abou.
