LOS ANGELES, AP.- California, kual durante vários aña tabata na márgen di e polítika nashonal, a bira e vortise pa e lucha di kontròl den Kongreso.
Ningun otro estado lo ta mas relevante pa un posibel ola demókrata ku por surgi den otoño próksimo. Pero promé ku esaki, e demókratanan mester evitá erornan djamars, den elekshon ku tin un multitut di kandidato ambisioso. Na mes momentu, e republikanonan ta enfrentá e posibilidat bergonsoso di no por kontra ku sufisiente voto pa nominá ningun kandidato den e kontienda pa Senado federal i gobernashon.
California ta esun mas importante di ocho estado ku tin elekshon djamars. E demókratanan i republikanonan di Montana pa Alabama i Mississippi pa New Jersey lo skohe su kandidatonan pa elekshon general di novèmber, e promé elekshon di mitar periodo di presidensia di Donald Trump.
Ku e posibilidat di un ola demókrata na horizonte, elekshonnan di djamars lo pone entusiasmo di e votadónan na prueba, ademas di e kalidat di kandidatonan i e influensia di Trump.
E presidente a hasi un yamada na su simpatisadónan, pidiendo nan pa laga nan bos resoná i no laga e demókratanan desapuntá nan den novèmber.
