PHILIPSBURG.- E formashon di un gobièrnu nobo na St. Maarten ainda no ta kla i gobernadó a prolongá e periodo te ku fin di aprel pa e formadó kumpli ku su enkargo. “Mi ta rekonosé e preokupashon kresiente den komunidat relashoná ku e fecha ku lo hura ministernan di e gobièrnu nobo, formadó dr. Luc Mercelina ta bisa.
Djaweps 28 mart formadó a duna gobernadó Ajamu Baly informashon riba e proseso di formashon. Den un komunikado di prensa Mercelina ta bisa ku for di 12 yanüari el a kumpli ku e promé parti di su mandato, esta ku un mayoria den parlamento a firma un akuerdo di disponibilidat pa traha huntu.
Dia 21 di febrüari, Mercelina ta sigui bisa, e akuerdo di gobernashon a keda kla i ratifiká pa e mayoria ku ta formadó un gobièrnu nobo. “Adishonalmente ta asina ku e kandidatonan pa minister mester sigui warda riba resultado di e proseso di screening kaminda tur instansia manera Prokurador General i servisio di seguridat, VDSM konforme lei ta risibí e informashonnan relevante.”
Mercelina ta splika mas aleu ku den lei no tin un tempu eksakto determiná ku e proseso di screening mester ta kla i ku e formadó tambe mester warda riba resultadonan di esaki for di tur e instansianan responsabel pa hasi e screening. “Ni formadó ni gobernadó no tin e outoridat pa intervení den esaki.”
Segun EXTRA por a komprondé ta hustamente Prokurador General i VDSM a pidi mas tempu pa nan hasi nan trabou. Tambe Gobernadó lo a duna Mercelina preguntanan adishonal pa e kandidatonan pa bira minister.
Mercelina den su komunikado ta finalisá bisando ku e ta sigurá komunidat di St. Maarten ku formadó i e mayoria ku ta formando un gobièrnu ta keda firme den nan promesa pa mas lihé ku ta posibel hura miembronan di e Konseho di Minister nobo. E ta spera, a base di kon prosesonan di formashon a kana den pasado ku esaki lo por tuma lugá pa 10 aprel awor.
“Nos meta kolektivo ta keda pa inisiá ku un gobernashon ku ta traha na interes di e poblashon di St. Maarten.”
